مريض 42 سنة يعاني من انفجار غضروفي L3-L4 وضغط شديد على الأعصاب، تم استئصال الغضروف وتثبيت الفقرات مع اختفاء الألم بعد الجراحة.
مريض عنده 42 سنة بدأت مشكلته من أكتر من سنة بوجع في أسفل الضهر ووجع ممتد للرجل اليمين الألم كان بيروح وييجي وكان محتمل فكان بيكمل حياته عادي من غير ما يكشف أو ياخد خطوة فعلية خصوصًا إن طبيعة شغله فيها مجهود بدني وتقيل وبيشيل حاجات تقيله وده كان بيزود الضغط على الفقرات والغضاريف مع الوقت لحد ما من حوالي شهرين الألم زاد بشكل واضح وبقى أقوى بكتير في الضهر والرجل اليمين وبدأ يزيد تدريجيًا وبقى مش مستجيب لأي نوع من الأدوية حتى المسكنات القوية والمخدرة مبقتش بتفرق معاه
مع زيادة الألم بالشكل ده عملنا الفحوصات والأشعة واتضح إن عنده انفجار في الغضروف بين الفقرة القطنية التالتة والرابعة وجزء كبير جدًا من الغضروف خرج برا مكانه وبقى ضاغط بشكل مباشر على الأعصاب وده كان سبب الألم الشديد اللي بيزيد بسرعة وكمان بدأ يحصل ضعف في العضلات وده كان مؤشر خطير إن الحالة بتتدهور بسرعة شديدة
القرار هنا كان لازم يكون سريع لأن المريض قبل العملية بيومين كان مش قادر يستحمل الألم نهائيًا ومفيش أي دواء كان بيجيب نتيجة وبدأ يظهر ضعف في الرجل وده بيخلينا نقلق من مرحلة أخطر ممكن تحصل في أي وقت وهي متلازمة ذيل الحصان أو الكودا إكوينا ودي حالة طارئة بتحصل لما الغضروف يضغط على الأعصاب داخل القناة العصبية وبتؤدي لشلل في الطرفين السفليين وفقدان التحكم في البول والبراز وبتحصل بشكل مفاجئ وسريع ولو محصلش تدخل جراحي عاجل ممكن تسيب مشاكل دائمة للمريض
من ستر ربنا إن الحالة كانت لسه قبل المرحلة دي وده خلانا نتدخل بسرعة وتم عمل استئصال للغضروف المنفجر وتوسيع القناة العصبية مع تثبيت للفقرات بين الفقرة القطنية التالتة والرابعة لتقليل الضغط على الأعصاب واستعادة الثبات للفقرات
والحمدلله بعد العملية مباشرة أول ما المريض فاق اختفى ألم الرجل تمامًا وقدر يحرك رجله بشكل طبيعي وحالته كانت مستقرة جدًا وبدأ يتحرك في وقت مبكر وخرج من المستشفى في وقت قصير والحمدلله النتيجة كانت ممتازة
الحالة دي بتفكرنا إن ألم الضهر مش دايمًا بسيط ومينفعش نستحمل ونأجل الكشف لأن التأخير ممكن يوصلنا لمراحل أخطر بكتير والتدخل المبكر دايمًا بيكون الفرق بين التعافي السريع وحدوث مضاعفات صعب
إستشاري جراحة العظام والعمود الفقري